සිහින ලොවේ පාවෙන අපේ අය .....

කවුරුත් කැමති සන්තෝසෙන් ඉන්න. ඒ උනත් එහෙම ඉන්න පුළුවන් කීයෙන් කීදෙනාටද. ඇත්තම කතාව ලෝකේ කවුරුවත් සන්තෝසයෙන් නෑ කියන එක . මේකට ඔයාලා එකග නොවෙන්නත් පුළුවන්. කොහොම උනත් අද කතාව සතුට ගැන .. සතුට කිව්වම කවුරුත් කියන්නේ “සතුට තියනවා දුක නැත්නම් ” කියලා . සතුට කිව්වම කාටත් මතක් වෙන්නේ දුක මොකද ඒ දෙක අතර ඒ තරම්ම බැදීමක් තියනවා . ඒත් දුක සතුට කියන මාතෘකාවන් ඈත් වෙලා සතුට සහ හීන ගැන කතා කරන්න හිතුවා. ගොඩක් අය හිතන්නේ මේ වචන දෙක අතර කිසි සම්බන්දයක් නෑ කියලා . ඒත් ලොකුම සම්බන්දය තියෙන්නේ මේ දෙක අතරේ කියලා මට නම් හිතෙනවා.

 හීන නැත්තේ කාටද . හැමෝටම හීන තියනවා. ඒක පුද්ගලයා අනුව වෙනස් වෙනවා .. කෙල්ලෝ වැඩියම කැමතියි ලස්සට ඉන්න . ඒ උනත් විවාහක කෙනෙක් නම් එයාටම කියලා ගෙයක් හදාගන්න ගොඩක් කැමති. ඒ වගේම හොද පවුල් ජිවිතයක් ගතකරන්නත් කැමැත්ත ගොඩක් වැඩියි. කොල්ලෙක් උනාම තියෙන්නේ ඔයිට හාත්පසම වෙනස් කාරණාවක් . ඇදුම පැලදුම කියන්නේ කොල්ලන්ට එච්චර දෙයක් නෙවෙයි. පිරිමි කියන්නේ “වෙඩින් එකට ඇදපු කෝට්එක මලමිනියටත් අදින කට්ටිය ” ඒ කොල්ලන්ගේ හැටි. ගොඩක් කොල්ලන්ට තියෙන්නේ වාහන පිස්සුව . හොද වාහනයක් ගන්න ගොඩක් කොල්ලෝ කැමති . හැම හීනයක්ම සැබෑ වෙනවනම් අපි කොච්චර කැමතිද? ඒත් අපේ සමහර හීන හැමදාම හීන විදියටම තියනවා. ඒ හීන සැබෑ කරගන්න අපිට අවදානමක් ගන්න වෙනවනම්? අපි කීයෙන් කී දෙනාද අපේ සුපුරුදු ජීවන රටාවෙන් මිදිලා ඒ අවදානම ගන්න කැමති වෙන්නේ? ඒ අවදානම ගන්න බැරි නිසාම හැමදාම අපේ ඒ හීන හීන විදියටම තියනවා.හීනත් එක්ක ජිවත් වෙන අය කොහොම හරි ඒ දේ ඉෂ්ට කරගෙනම තමයි පස්ස බලන්නේ. සමහර අය නම් බලන්නේ හීනම තමයි. කරන්න බැරි දේවල් ගැන හීන දකින අයත් නැත්තේම නෑ . ඒත් එහෙම කරන්න බැරි හීන සැබෑකරගන්න අය තමයි ලෝකයත් වෙනස් කරන්නේ .
 

හීන ඉෂ්ට වෙනවා නම් ඊට වඩා සතුටක් නෑ. අපි හැමෝම හොයන්නේ සතුට. මැරෙන්න බැරි කමට ජීවත් වෙන කෙනෙක් වුණත් සතුටක් ලැබෙන පුංචිම දෙයක් වුණත් අතහරින්න කැමති නැහැ.හරියට මැරෙනකොට අරන් යනවා වගේ . අපි ආස කරන හැමදෙයක්ම ලං කරගන්න හදන්නේ ඒ දෙයින් අපිට සතුටක් ලැබෙයි කියලා හිතන නිසා. කොච්චර සල්ලි තිබුණත් මොකටද හිතේ සතුටක් නැත්තම්? ප්‍රශ්න එනකොට දුප්පත් පොහොසත් බේදයක් නැහැ. හැමෝටම ප්‍රශ්න තියනවා ඒත් සල්ලි නැත්තම් අපි හිතන්නේ සල්ලි නැති නිසා තමයි මේ ඔක්කොම ප්‍රශ්න කියලා. 
හීන එක්ක ජිවත් වෙන මිනිස්සු ඒවත් එක්කම වැළලිලා යනවා කියල කතාවක් තියනවා .හීනත් එක්ක ජිවත් වෙන්න ගියාම ලෝකෙම ප්‍රශ්ණ අපේ ඔලුවෙලු. එහෙම කිව්වට ප්‍රශ්ණ තියෙන්නේ හීන තියන අයට විතරද ? ප්‍රශ්ණ නැත්තේ කාටද ? පොඩි කාලේ ඉදම්ම මිනිස්සුට තියෙන්නේ ප්‍රශ්නම තමයි. පොඩි අය අම්මලත් එක්ක යනවා දැකලා ඇතිනේ. අම්මගෙන් දකින හැම දේ ගැනම අහනවා.   ලොකු වුනා කියලා  ප්‍රශ්ණ නැද්ද .සමහර අය නම් අනුන්ගේ ප්‍රශ්ණත් තමන්ගේ ගොඩට දා ගෙන දගලනවා . ඒ වුනාට අද ගොඩක් අයට තියෙන්නේ ප්‍රශ්ණ නොවෙන ප්‍රශ්ණ . සමහර අයට ප්‍රශ්නයක් නැති එක්කත් ප්‍රශ්නයක්. මොකට අද ගොඩක් අයට ඒවා තේරුම් ගන්න බැරිවෙලා තියනවා ප්‍රශ්ණ කියන්නේ මොනවද කියලත්. සමහර අයට ප්‍රශ්ණත් තියනවා උත්තරත් තියනවා ඒත් හරි ප්‍රශ්නෙට හරි උත්තරේ හොයා ගන්න බෑ. ප්‍රශ්ණ වලට හොදම විසදුම ඒවාට මුණ දෙන එක. හැබැයි වෙන්නේ නම් අනිත් පැත්ත . ප්‍රශ්ණ මග අරින්න දගලන අය නම් බොහෝයි. හැබැයි එහෙම පැනලා යන ගොඩක් අය නවතින්නේ ගං පතුල් වලයි. රේල් පිලි උඩයි. ජිවිතේ එතනින් ඉවරයි.

ගොඩක් අයට තියෙන්නේ ආදර ප්‍රශ්න .. ඒක කලින්  ලියලත් තියනවා . එකේ කොටසකුත් මේකටම අමුනන්නම් ඔක්කොම කියවන්න (මෙතනින් ) .  පොඩි කාලේ අම්මට තාත්තට ආදරෙන් හිටපු කට්ටිය තරුණ කාලේදී කෙල්ලෙක්ගේ හරි කොල්ලෙක්ගේ හරි තුරුලේ නැළවෙනවා .ඒත් ඉතින් ඒ නැළවෙන තොටිල්ලෙන් බිමට වැටුනොත් කරගන්න මෝඩ වැඩ දැක්කම හිනත් යනවා.බොක්කෙන්ම ආදරෙයි කියල කෝච්චියට පනින්න,ගගට පනින්න ,වස බොන්න හරි දක්ෂයි .නමුත් මේ ලැබිල තියන ජිවිතේ වටිනාකම මෙපමණයි කියල නිමකරන්න බෑ .ලෝකේ තියන සියලුදේට වඩා වටිනා දෙයක්. ඒක සමාන වෙන්නේ තවත් ජීවිතයකට විතරයි.ආදරේ ජීවිතේට අවශ්‍යයි තමයි නමුත් එහෙමයි කියල ආදරය නිසා ජීවිතය විනාශ කරගන්නවා නම් ඒක තමයි  කරන ලොකුම  මෝඩ කම .ඔහුට  /ඇයට ඔබ ගොඩක් ආදරේ වෙන්න පුළුවන් නමුත් ඔහු /ඇය ඔබගේ ආදරය පිලි ගන්නේ නැති නම් එකට ඔබ ඔබේ ජීවිතය නැති කරනවා  නම්  ඔබ පරාදයි .මොකද ඔබ මිය ගියාට ඔබ ආදරය කල කෙනා ජිවත් වෙන නිසා ..කරන්න තියන හොදම දේ ඒ කෙනාව අමතක කර ඔබට ගැලපෙන හොද කෙනෙක් සොයාගැනීම පමණයි .. එහෙම උනොත් ඔබට පුළුවන් වේවි ඒ කෙනාට ඔබ ඔහු /ඇය  නැති උනත් වෙනදාටත් වඩා සතුටින් ඉන්න බව  පෙන්වන්න... සියදිවි නසා ගැනීම මිනීමැරුමක් හා සමාන දෙයක්.එය ආගමානුකුලවත් නිතියනුත් එසේමයි.නීතියට අනුව ඔබේ ජීවිතය ඔබේ වූවාට එය නැතිකර ගැනීමට ඔබට අයිතියක් නෑ.ඔබ සියදිවි නසාගැනීමට තැත් කලොත් ඔබට ඔබේ ජීවිතය නිසාම රජයට වන්දියක් ගෙවීමට සිදුවීවී . අනිතිමට පුංචි කතාවක් කියන්නම් .

දවසක් රෑ වෙලා ගමනක් යන අයෙක්ට විදුලි පහන් කණුවක් යට යමක් සොයමින් සිටින මිනිසෙකු හමු වුනා. විමසිල්ලෙන් දන බිම ගහගෙන හොයන මේ මිනිසා අසලට ගිහින් ඇහුවා සොයන්නේ මොනවාද කියලා. “අද මම විතරයි ගෙදර ඉන්නෙ. ඒත් ගේ ඇතුලට යන්න විදිහක් නැ යතුර බිම වැටුන නිසා. මම මේ හොයන්නේ යතුර.” ඔහු කීවා.ගමන ගිය කෙනත් තමන් යන ගමන මොහොතක් නතර කරලා ඔහුට උදවු කරා. හැබැයි යතුර හම්වුනේ නෑ. ඔහු ඇහුවා “ඔයාට හොදටම මතකද යතුර නැති උනේ මෙතන කියලා. ඒක තිබුනා නම් අපිට හම්බ වෙන්න ඕනි. මෙතන නම් නැති බව මට හොදටම විශ්වාසයි.” ඒ මිනිසා පිළිතුරු දුන්නා “නෑ! යතුර නැති උනේ මිදුලේ. ඒත් මිදුලේ එළියක් නැති නිසා මම මේ එළිය තියන තැන හොයන්නේ”.
අපි අපේ ප්‍රශ්න වලට හේතු විදිහට අනිත් අයට දොස් පවරන එකත් මේ වගේ දෙයක්. ඔබේ ප්‍රශ්නයේ වගකීම බාර ගන්න. අන් අයට දොස් පවරන්න එපා. ජීවිත ජයග්‍රහනයේ ආරම්භය එයයි